Kandidati 2026 : enskripsyon ak depo pyès yo pwolonje jiska 31 oktòb

NÒT POU LAPRÈS

KONSÈY ELEKTORAL PWOVIZWA

Pwolongasyon peryòd enskripsyon kandida yo sou entènèt ak ajisteman kèk etap nan pwosesis elektoral la

Konsèy Elektoral Pwovizwa a (CEP) enfòme popilasyon an an jeneral, pati politik yo ak gwoupman pati politik yo an patikilye, apre konsiltasyon li te mennen ak aktè politik yo epi apre Konsèy Minis la te adopte, 5 oktòb 2026 la, modifikasyon ki fèt nan Dekrè elektoral 2 jen 2026 la, gen kèk dat nan pwosesis elektoral la ki rearanje.

Pou sa, CEP la fè konnen peryòd enskripsyon kandida yo sou entènèt ansanm ak peryòd pou depoze pyès obligatwa yo pwolonje jiska 31 oktòb 2026. Mezi sa a vize sitou bay kandida yo ak estrikti politik konsène yo tan ki nesesè pou yo fè fòmalite kad legal ak reglemantè ki anvigè a prevwa yo.

Anplis, peryòd ki te fikse okòmansman pou kanpay elektoral la ranvwaye. Nouvo dat kòmansman ak fen kanpay la ap kominike pita nan kad kalandriye elektoral la, ki pral mete ajou epi finalize ansanm ak estrikti politik ki gen dwa patisipe nan pwosesis elektoral la.

CEP la fè konnen tou pwosesis enskripsyon elektè yo ap kontinye. Kidonk, li ankouraje sitwayèn ak sitwayen ki ranpli kondisyon yo pou yo fè demach ki nesesè yo pou yo kapab egzèse dwa vote yo nan pwochen eleksyon yo.

Konsèy Elektoral Pwovizwa a ap travay aktivman pou finalize yon kalandriye elektoral ki mete ajou, ki pran an konsiderasyon nouvo dispozisyon Dekrè elektoral la, egzijans teknik ak operasyonèl pwosesis la, ansanm ak kondisyon ki nesesè pou diferan etap pwosesis elektoral la dewoule byen. Y ap pibliye kalandriye sa a pi vit posib.

CEP la remèsye pati ak gwoupman pati politik yo pou patisipasyon yo nan konsiltasyon yo ak pou kontribisyon yo. Li reyafime volonte li pou kenbe yon dyalòg konstriktif ak tout aktè konsène yo epi pou kontinye preparasyon ki nesesè pou òganize eleksyon ki kredib, transparan ak enklizif.

Petyonvil, 5 oktòb 2026.