Eleksyon 2026 : eta avansman pwosesis elektoral la nan dat 21 septanm

NÒT POU LAPRÈS

KONSÈY ELEKTORAL PWOVIZWA

Eta avansman pwosesis elektoral la nan dat sa a

Konsèy Elektoral Pwovizwa a (CEP) enfòme popilasyon an an jeneral ak laprès an patikilye sou eta avansman pwosesis elektoral la. Jiska prezan, plizyè etap enpòtan deja franchi, sa ki montre gen gwo avansman nan preparasyon pwochen konpetisyon elektoral yo.

Operasyon enskripsyon elektè yo, ki te kòmanse pwogresivman depi 20 ak 21 jiyè 2026 nan nèf (9) depatman peyi a epi 30 jiyè 2026 nan depatman Lwès la, ap kontinye sou tout teritwa a.

Nan lendi 21 septanm 2026, 1 285 Sant Enskripsyon ak Vòt (CIV) ap fonksyone nan tout peyi a. Gen kèk depatman kote plis pase 95 % CIV yo ap fonksyone. Se depatman Grandans ki gen 117 CIV, Sidès ki gen 132, Sid ki gen 168, Nip ki gen 105 ak Nòdès ki gen 104. Depatman Lwès la, bò kote pa li, gen 148 CIV k ap resevwa elektè chak jou pou yo ranpli fòmalite enskripsyon yo nan rejis elektoral la.

Nan menm dat la, plis pase 628 755 elektè deja enskri nan rejis elektoral la, sa ki reprezante plis pase 10 % elektora potansyèl la (sitwayen ki gen Kat Idantifikasyon Nasyonal). Depatman Sidès, Grandans ak Nip anrejistre pi gwo pousantaj elektè ki enskri. Yo rive respektivman nan 16 %, 15 % ak 14,5 % popilasyon yo ki gen laj pou vote.

Enskripsyon pati ak gwoupman politik yo, ansanm ak tiraj osò piblik ki te bay chak estrikti politik agreye yon nimewo kanpay, se yon etap enpòtan CEP la fini kounye a.

Jiska prezan, sou platfòm enskripsyon kandida yo, 30 estrikti politik agreye, sa vle di 18 pati ak 12 gwoupman politik, soumèt lis 30 000 manm, aderan oswa senpatizan yo. Pou kandida yo, platfòm nan montre 7 kandidati pou prezidans, 162 pou Sena ak 419 pou Depite ki anrejistre.

Pwosesis enskripsyon sou entènèt ak depo pyès kandida yo, ki te kòmanse 20 out 2026, ap kontinye jiska 9 oktòb 2026.

Rekritman, fòmasyon ak mobilizasyon pèsonèl vakatè yo se yon lòt etap enpòtan nan preparasyon operasyon elektoral yo. Jiska prezan, efò sa yo pèmèt CEP la rekrite epi fòme 2 853 Ajan Rejis Elektoral (ADRE) ak 4 643 Ajan Sekirite Elektoral (ASE).

An menm tan, jedi 17 septanm 2026, enstitisyon elektoral la te mete fen nan yon seri fòmasyon sou kontansye elektoral pou plis pase 1 000 komisè nan dwa elektoral ak jij elektoral nan nèf (9) depatman peyi a.

Konsèy Elektoral Pwovizwa a kontinye travay pou mete machin elektoral la an plas nan preparasyon pwochen eleksyon yo. Li pwofite reyafime volonte li pou dirije pwosesis elektoral la yon fason enklizif, san patipri ak transparan, nan respè total prensip endepandans, entegrite ak responsablite demokratik, nan enterè siperyè Nasyon an.

Petyonvil, 21 septanm 2026.